“AccessBank”ın kredit portfeli 200 milyonu ötdü

AccessBank 2008-ci ilin nəticələrini elan etdi.

Bakı, 26 yanvar 2009-cu il. “AccessBank”ın artım dinamikası, bank xidmətləri bazarının orta inkişaf tempini qat-qat üstələyir. Fəaliyyətinin 6-cı ilinin nəticələrinə əsasən, dünya maliyyə sektorundakı mürəkkəb vəziyyətə baxmayaraq, AccessBank bir çox fəaliyyət istiqamətlərinə görə ölkədə əhəmiyyətli mövqe tutub.

İl ərzində “AccessBank”ın aktivləri 81% artaraq 241 milyon ABŞ dollarına çatıb. 2008-ci ilin yekunlarına görə, AccessBank kreditləşmə sahəsindəki liderlərdən biridir – belə ki, bankın kredit portfeli 84% artaraq 200 milyonu ötüb, depozit portfeli isə 91% artıb. Bankdan kredit alan müştərilərimizin sayı da 50% artıb – 2007-ci ilin sonunda onların sayı 46 000 nəfər olduğu təqdirdə, indi bu göstərici 70 000 nəfər təşkil edir.

Ümumi kapital iki dəfə - 26,4 milyon ABŞ dollarından 54,5 milyon ABŞ dollarınadək artıb. Ümumi mənfəət isə il ərzində 13 milyon ABŞ dollarınadək yüksəlib.

Bundan əlavə, 2008-ci il ərzində 6 filial açılıb və 200-dən artıq əməkdaş “AccessBank”da işə qəbul olunub. Həmçinin, əlamətdar hadisələr ondan ibarətdir ki, 2008-ci ilin fevral ayında nəinki AccessBank, həmçinin bütün Azərbaycan üçün beynəlxalq bazarda ilk Bond buraxılıb və Fitch reytinq agentliyi tərəfindən AccessBank, Azərbaycanın özəl bankları arasında ən yüksək BB+ reytinqinə layiq görülüb. 2008-ci il, həmçinin, Bankın adının Azərbaycan Mikromaliyyələşdirmə Bankından dəyişlərək AccessBank olması ilə əlamətdar oldu.

“AccessBank”ın Baş Meneceri Endryu Pospilovski ötən ilin yekunlarını şərh edərək bildirib: «Maliyyə dünyasında vəziyyətin mürəkkəb olmasına baxmayaraq, 2008-ci il AccessBank üçün çox uğurlu oldu və bankın uğurları günbəgün artır. Hər ay biz bütün ölkə üzrə 4 000-dən artıq sahibkara yeni kreditlər verirdik və 2008-ci il “AccessBank”a, özünün ən etibarlı tərəfdaş olduğunu müştərilərə sübut etmək üçün imkan yaratdı».