AccessBank-ın depozit portfeli 90% artıb

AccessBank 2009-cu ilin birinci yarımilliyi üzrə nəticələri dərc edib.

Bakı, 20 iyul 2009-cu il. 2009-cu ilin birinci yarımilliyinin nəticələrinə əsasən, AccessBank-ın fəaliyyətinin daha da inkişaf etdiyi nəzərə çarpır.

Bankın aktivləri 6 ay ərzində 22% artaraq 30 iyun tarixinə 296 milyon ABŞ dolları təşkil edib. AccessBank kreditləşmə üzrə liderlər siyahısındadır və hər gün öz mövqeyini möhkəmləndirir – hal-hazırda bankın kredit portfeli 241 milyon ABŞ dolları, 6 ay ərzində artım isə 18% təşkil edir.

Depozit portfeli isə xüsusi əhəmiyyət kəsb edir – ilin əvvəlindən başlayaraq portfel 90% artıb. Portfelin bu səviyyədə artması depozit bazarında ümumi durğunluq şəraitində baş verib və Azərbaycan əhalisinin AccessBank-a olan etimadını bir daha nümayiş etdirib.

AccessBank İdarə Heyəti Sədrinin Müavini, Əməliyyat Meneceri Anar Həsənov, yarımilliyin nəticələrini şərh edərək deyib: «Bankın son 6 ay ərzində göstərdiyi nəticələri təhlil edərkən, bazarda bizim bankı əlverişli şəkildə önə çıxaran bir neçə amili qeyd etmək lazımdır. Bunlar, ilk növbədə, kredit portfelinin yüksək keyfiyyətinin qorunub saxlanması, bizim bütün debitorlarımızı daimi maliyyələşdirmək imkanı, depozit portfelinin əhəmiyyətli dərəcədə artması və bunun mükəmməl artım sürətini nümayiş etdirməsi, ölkə əhalisinin bütün təbəqələrinin tələbatlarının ödənilməsinə yönəldilmiş yeni məhsulların uğurla tətbiq olunması, eləcə də filial şəbəkəsinin genişləndirilməsi və işçi heyətinin sayının artırılması istiqamətində bankın daimi fəaliyyəti və bunun sayəsində bizim öz potensial müştərilərimizə daha yaxın olmağımıza şərait yaradılmasıdır. Əldə olunmuş nəticələr bizim yaxın gələcəyə daha da nikbinliklə baxmağımıza imkan verir və müştərilərimiz əmin ola bilərlər ki, göstərdiyimiz xidmətlərin keyfiyyətinin daha da yüksəldilməsi istiqamətində bankın gördüyü işlər hər bir hesabat dövründə daha da təkmilləşdiriləcək».

Bundan əlavə, cari ilin əvvəlindən etibarən 2 yeni filial açılıb və 150 nəfərdən artıq yeni əməkdaş işə qəbul olunub. Həmçinin, əlamətdar haldır ki, 2009-cu ilin aprel ayında Azərbaycanın özəl bankları arasında ən yüksək reytinqin (BB+) məhz AccessBank-а məxsus olması Fitch reytinq agentliyi tərəfindən növbəti dəfə təsdiqlənib. Bundan əlavə, Londonda keçirilən və maliyyə sektorunun problemlərinin müzakirə olunması məqsədi ilə bütün dünyanın maliyyə liderlərinin iştirak etdiyi «2009 Financial Times Sustainable Banking» konfransında dünya şöhrətli «Financial Times» qəzeti AccessBank-ın ən sabit banklardan biri olduğunu təsdiqləyib.